Bilim ishqida

Jahan renaliri ichre bilimdek bir güzel yar
Bilimdin özge tutqan yar bolur u gahida bar-yoq.

Qaraqashliq , tulun aylar sanga bir nechche kün yoldash,
Eger sen puldin ayrilsang ,séni tashlaydu ,héch ar yoq.

Kirip keynige nepsingning bilimdin özge yar tutsang,
Bishinggha chüshse bir künler ,u chaghda sen kebi xar yoq.

Qulaq salsang muhebbet ehlining peryadu ahigha,
Yutup zerdap, piraqtin dad démektin bashqiche zar yoq.

Tepekkur eyliseng ishqiy eserlerni oqup her dem,
Qarangghu der yoruq dunyani hem alem kebi tar yoq.

Yürüp menmu güzel izlep jahaletke esir bolghan,
Xalayiq aldida yürsem, méningdek belki eghyar yoq.

Paraghet izliseng , esla bilimdin özge yar tutma,
Séning qediringni saqlashta bilimdek yaxshi hemkar yoq.

Hayatliqta bilim qandaq kishining yoldishi bolsa,
Qeyerge barsa bash qatmas,bilimdek anga ghemxar yoq.

Bilimsiz saq tining mejruh, hemishe nale-peryadta,
Jahan ichre bilimsizning dilidek eski bimar yoq.

Bilimge ashna bolsang, oqush ishqida bulbul bol,,
Ögenmekke maarip baghchisidek yaxshi gülzar yoq.

Jahanning qaysi yochuq , puchmiqigha bash tiqip yatsang ,
Bilim tartip chiqar meydan'gha, héchbir kimge exbar yoq.

Bilim rohiy ozuq insan hayatigha , eger bilseng,
Bilimning qedrini bilgüchi ölmes, bunga inkar yoq.

Chapan hörmetliri héch chagh chapandin ayrilip qalmas,
Kéter puldin yighilghan hörmiting pul birle, esrar yoq.

Chapan birle özüngni paqiratsang bir boyaqchi sen,
Bilim esri bügün, sirliq chapanlargha xéridar yoq.

Bulardin qolgha kelgen abruy jinining chüshi oxshash,
Xiyaliy bu tilekte sen kebi baxishigha jinidar yoq.

Ümid qilma , pelek hergiz séning bextingge chörgülmes,
Bügün bay, ete sendek héch gaday yoq, belki qerzdar yoq.

Bilimdin chette körgen döliting janning japasidur,
Jénigha jebri qilmaqqa bilimsizdek sitemkar yoq.

Bilimdin hemme ish royapqa chiqqan bir esirdur bu,
Bilish lazimki bu künde bilimsizlerge xushtar yoq.

Bilimdin batining nurlanmisa, könglüng qarangghu tün,
Quyash nurigha munkir shepirenglerge medetkar yoq.

Zéminini top qilip oynashni sen chaqchaq , guman qilma,
Heqiqettur bügün her ish , kemektek jadu-eyyar yoq.

Ejeblenme , bilim nurida nurlansa her kishi köngli,
Uninggha kökte , suda, tagh, déngizda yürse dishiwar yoq.

Bilimlik taghni bagh eyleshte héchqanche japa körmes,
Bilmsiz qan yutar, nadan kishlerdek japakar yoq.

Özüngni , nim shéhit, ushbu pikirge eyligin qurban,
Bilimdin rishte üzgenler kebi qattiq gunahkar yoq.


1936-Yili,féwral